Оҕо тэрилтэлэрин улахан форумугар ыытыллыбыт «Оҕо сайдыытын сүрүн тирэҕэ- Ийэ тыл» диэн санаа атастаһыытын түһүлгэтигэр оскуола иннинээҕи саастаах оҕо ийэ тылын, атын тылы иҥэриниитин туһунан бэрт туһалаах кэпсэтии буолан ааста. Түһүлгэни салайан ыыттылар Михалева О.И., ҮӨҮИҮҮ директоры солбуйааччыта уонна Захарова С.М., куорат №51 “Кэскил” детсадын сэбиэдиссэйэ. Уһуйааччы уонна Аҕа сүбэһит сылынан ыҥырыылаах ыалдьыттар Саввина Мария Николаевна, ССРС орто үөрэхтээһинин туйгуна, КД Ушинскай аатынан мэтээл хаһаайына, үгүспүт үөрэммит, бииргэ үлэлэспит, ытыктыыр убаастыыр сүбэһиппит, Анатолий Николаевич Павлов- Дабыл, биллиилээх суруналыыс, тыл үөрэҕин билимин кандидата, Саха Өрөспүүбүлүкэтин культуратын үтүөлээх үлэһитэ, саха ыччатын төрүт культуратыгар, сиэргэ-туомҥа уһуйууга үгүс үлэлэрдээх тумус туттар ытык кырдьаҕаспыт буоллулар. Ону сэргэ «Ийэ тыл кэскилэ» уопсастыбаннай хамсааһын салайааччыта, Хотугу норуоттар кыһалҕаларын чинчийэр гуманитарнай үнүстүүт социолингвистика киинин чинчийэр үлэһитэ Никитина Вилюяна Николаевна тылы баһылааһын билиҥҥи туругун чинчийиилэрин кэпсээбитэ үгүс толкуйу үөскэттэ, сэҥээриини ылла.
Дьокуускай куоракка 2013 сылтан үлэлиир Саха тылынан иитэр-сайыннарар уһуйааннар педагогтарын Ассоциациятын туһунан, баар кыһалҕалар, турар соруктар тустарынан түһүлгэ модератора 51 нүөмэрдээх Кэскил уһуйаан сэбиэдиссэйэ Захарова Сардана Михайловна сырдатта. Өрөспүүбүлүкэ араас муннуктарыттан кэлбит биир идэлээхтэрбит үлэлэрин көрдөрдүлэр, төрөппүккэ хайдах, туох үлэ ыытыллыан сөбүн, ханнык ньымалары тутталларын кэпсээбиттэрэ элбэх болҕомтону тарта. Бу бары ынырыллыбыт дьон сүрүн сорук быһыытынан төрөппүтү өйдөтөр, үөрэтэр, сүбэлиир үлэ олус туһалааҕын, ити хайысхаҕа үлэни саҥардан, билиҥҥи олох ирдэбиллэригэр сөп түбэһиннэрэн, куйаар ситимин туһанан үлэни күүһүрдүү наадалааҕын бэлиэтээтилэр. Мустубут иитээчилэр араас оҕолуун үлэлиир ньымаларын көрдөрөн кэпсээтилэр. Олус иһирэхтик Сунтаардар оҕо тэрилтэлэригэр үгэс буолан ыытыллар сарсыардааҥҥы алгыстарын көрдөрөн ыыппыттара турукка киллэрдэ, дьону түмтэ. Төрөппүтү, оҕону кытта үлэҕэ таһаарыылаах үлэ көрүҥнэрин, ньымаларын сүрдээх дириҥ ис хоһоонноохтук Дьокуускай куорат, Хатас, Сунтаар, Ытык-Күөл, Хатыстыыр иитээччилэрэ астылар, көрдөрдүлэр. Түмүккэ бары кыттыылаахтар түһүлгэ үлэтин олус туһалааҕын, үлэҕэ туттарга элбэх саҥаны билбиттэрин бэлиэтээтилэр.
Михалева О.И., ҮӨҮИҮҮ директоры солбуйааччыта,
Захарова С.М., куорат №51 “Кэскил” детсадын сэбиэдиссэйэ
