С.Н.Донской-II аатынан Үөрэҕи сайыннарар уонна идэни үрдэтэр үнүстүүт, СӨ АТ Олоҥхо тыйаатыра, Научнай-методическай үлэҕэ уонна тас сибээскэ олоҥхо киинэ, Дьокуускай куорат үөрэҕин салалтата, Айыы кыһата национальнай гимназията тэрийбит норуот тылынан уус-уран айымньытын чыпчаала буолбут-олоҥхобут тылын-өһүн дириҥник билэргэ туһуламмыт 7-10 кылаас үөрэнээччилэригэр анаммыт III өрөспүүбүлүкэтээҕи олоҥхо олимпиадатын түмүгэ таҕыста.
Уус-уран тылынан сааһылаан суруйар, ааҕар, сиһилии ымпыктаан быһаарар сүдү айымньы олоҥхобут буоларын биллэрэр сыаллаах олимпиадаҕа 7 кылааска-95, 8 кылааска-75, 9 кылааска-72, 10 кылааска-44 үөрэнээччи Алдан, Амма, Абый, Нам, Таатта, Ньурба, Мэҥэ Хаҥалас, Сунтаар, Бүлүү, Уус Алдан, Үөһээ Бүлүү, Кэбээйи, Горнай, Ленскэй, Мииринэй, Өлүөхүмэ, Чурапчы, Хаҥалас, Уус Дьааҥы, Үөһээ Халыма, Үөһээ Дьааҥы, Эдьигээн улуустарыттан уонна Дьокуускай куораттан, Тулагыттан – барыта, өрөспүүбүлүкэ 22 улууһуттан 286 оҕо кытынна. Кыттааччы 31% уол, онтон кыттааччы саамай элбэх ахсаана 7-с кылаастарга, (95оҕо) баар.
Олоҥхо олимпиадатын сорудаҕа түөрт түһүмэхтээҕэ «Олоҥхо ис хоһооно»,«Олоҥхо уран тыла», «Олоҥхо – үтүө санаа өрөгөйө», «Олоҥхо тылдьыта».
Кылаас ахсын сорудахтар үөрэх бырагырааматынан киирбит олоҥхолорго тирэҕирбитэ.
Кыттааччылар бары түһүмэхтэргэ көхтөөхтүк кыттыбыттар. Хоруйдарыттан көрдөххө, ордук олоҥхо ис хоһоонугар сыһыаннаах ыйытыыларга, дьоруойдар ааттарыгар уонна дьүһүйүүгэ ыарырҕаппыттар. Үөрэнээччилэр эппиэттэрэ толору уонна сиһилии буолбута хамыыһыйаны үөрдэр.
Куйаар ситиминэн ыытыллыбыт олоҥхо олимпиадатыгар көхтөөхтүк кыттыбыт бары үөрэнээччилэри уонна учууталлары эҕэрдэлиибит.
Туоһу суругу хас биирдии кыттааччы хачайдаан ылар. Кыайыылаахтарга, миэстэлэспиттэргэ, биһирэбил диплом ылбыт кыттааччыларга дипломнаргыт электроннай почтаҕытыгар ыытыллыаҕа.
Олоҥхону билэр, ааҕар, ырытар дьоҕургут сайда турдун!
Дьүүллүүр сүбэ