2021 с муус устар ый 15 күнүгэр С.Н.Донской-II аатынан Үөрэҕи сайыннарар уонна идэни үрдэтэр үнүстүүт, Сунтаар улууһун Бордоҥ орто оскуолата 90 сыллаах үбүлүөйүн көрсө олохтоох суруйааччы, педагогическай үлэ бэтэрээнэ, “Учууталлар учууталлара”, Россия суруналыыстарын чилиэнэ, кыраайы үөрэтээччи, методист-учуутал, Алексеевтар педагогическай династияларын төрүттээччи Алексеев Николай Гаврильевич – Начын Сээн сырдык кэриэһигэр анаммыт өрөспүүбүлүкэтээҕи тэттик кэпсээн күрэҕин ыыттылар. Күрэх куйаар ситимин нөҥүө буолла. Айар үлэ саҕыллар түһүлгэтигэр араас улуус үөрэнээччилэрэ көхтөөхтүк кытыннылар. Ол курдук, Амматтан, Тааттаттан, Намтан, Бүлүүттэн, Чурапчыттан, Ньурбаттан, Сунтаартан барыта 56 айымньы киирбитин дьүүллүүр сүбэ сыаналаата.
Кэпсээн күрэҕэр кыттыбыт, айар үлэ алыбар ылларан, сахалыы тылынан куттарын уһугуннарбыт күндү үөрэнээччилэргэ уонна учууталларыгар махтал буоллун!
