Олунньу 18 күнүгэр П.А.Ойуунускай төрүттээбит Суруйааччыларын союһугар эппиэттиир сэкиритээринэн үлэлии сылдьыбыт суруйааччы Федор Григорьевич Винокуров-Даадар төрөөбүтэ 110 сылыгар аналлаах өрөспүүбүлүкэтээҕи научнай-практическай онлайн-конференция ыытылынна. Тэрээһини Арассыыйа суруналыыстарын сойууһун чилиэнэ Елена Винокурова салайда. Бу тэрээһиҥҥэ П.А.Ойуунускай аатынан Литературнай музей, М.К.Аммосов аатынан Хотугулуу Илиҥҥи федеральнай университетын сахалыы-нууччалыы тылбаас уонна истилиистикэ кафедратын, С.Н.Донской-II аатынан үөрэх үлэһиттэрин идэлэрин үрдэтэр институт, Горнай улууһун П.Д.Аввакумов аатынан киин библиотекатын (сэб. Анна Иванова), Кэбээйи улууһун Т.Е.Сметанин аатынан киин библиотекатын (сэб. Анна Ионова), Куокуй орто оскуолатын уонна нэһилиэк библиотекатын, Мукучу нэһилиэгин модельнай библиотекатын (сэб. Ия Им), И.Е. Левин аатынан Танара орто оскуолатын, Мукучу гимназиятын, Томпо оройуонун киин библиотекатын, Герой Ф.М.Охлопков аатынан Кириэс Халдьаайы орто оскуолатын, Л.Л.Холмогорова аатынан Байаҕантай нэһилиэгин модельнай библиотекатын үлэһиттэрэ, библиотекардара, учууталлара кытыннылар.
Конференция Хаандыга орто оскуолатын 1 «б» кылааһын (сал. Мария Чекурова), Герой Ф.М.Охлопков аатынан Кириэс Халдьаайы орто оскуолатын (сал. Гаврил Павлов), Кэбээйи улууһун Батамай орто оскуолатын үөрэнээччилэрин, учууталларын Даадар хоһооннорун уус-уран ааҕыыларынан саҕаланна.
Саха норуодунай суруйааччыта Николай Лугинов саха литературатыгар Даадар аата суолтатын, нэһилиэстибэтин үөрэтиигэ болҕомто уурууллуутун, Саха сирин Суруйааччыларын сойууһун чилиэнэ Николай Винокуров-Урсун суруйааччы дьиэтээҕи архыыбын, П.А.Ойуунускай аатынан Литературнай музей үлэһитэ Ефросинья Ноговицына Даадар Кэбээйитээҕи сылларын, ХИФУ сахалыы-нууччалыы тылбаас уонна истилиистикэ кафедратын доцена Лидия Манчурина суруйааччы айымньыларын тылын-өһүн, истилиистикэтин, методист-учуутал Василиса Шишигина суруйааччы айымньыларын оскуолаҕа үөрэтии боппуруостарын туһунан сэргэх интэриэһинэй иһитиннэриини оҥордулар. Саха сирин суруйааччыларын сойууһун бэрэссэдээтэлин солбуйааччы, «Чолбон» сурунаал эрэдээктэрэ Гаврил Андросов суруйааччы урут тахсыбатах хоһооннорун бэчээттэммитин кэпсээтэ. Суруйааччы Даадар аатын Горнай, Кэбээйи улуустарыгар күн бүгүнүгэр диэри олус истиҥник ахталлар. Ол туоһутунан, араас тэрээһиннэри, бырайыактары ааҕааччыларга тиһигин быспакка ыыталлар. Даадары кытта алтыспыт дьонтон ахтыы, хаартыска хомуйан матырыйаал мунньубуттар. Томпо оройуоннааҕы киин библиотека сүрүн библиотекара Александра Ефимова Иван Харитонов «Даадар суруйааччы» кинигэтин, учуутал Ирина Харайданова үөрэнээччилэргэ аналлаах “Даадар ааҕыыларын», “Даадар” түмсүү, библиотекарь Инна Никитина Даадарга туруоруллубут өйдөбүнньүк бэлиэ туһунан сырдаттылар.
Ыытыллыбыт конференция түмүгүнэн хомуурунньук тахсара былааннанар.Алдан өрүс үрдүгэр төрөөбүт биир дойдулаахпыт, суруйааччы Федор Григорьевич Винокуров-Даадар аата үйэлэр тухары ааттана туруоҕа.
Лена Слепцова